Minister Rene Herde tambe tin pensa di retira ora cu aña bolter

ORANJESTAD – No ta solamente prome minister Mike Eman ta retira dia 1 di januari proximo di su funcion como prome minister, pero tambe actual minister di e.o. comunicacion y infrastructura drs. Rene Herde. Fuentenan cerca di e proceso den e partido, a confirma esaki pa Noticiacla e siman aki. Pa varios dia tabatin rumornan fuerte cu tabata circula informando cu e partido tin problema interno pa yena no solamente 1 funcion ora aña habri, sino 3 posicion. Esta esun di prome minister, esun di minister di husticia y uno mas. Esey a resulta di ta e carteranan cu Rene Herde ta cubriendo. 

MOTIBO PA CAMBIO

Mientras cu e motibo ‘oficial’ no ta conoci, noticiacla tin informacion tambe cu di basta tempo, tin preocupacion den seno di Herde su oficina, entre otro, cu e presion y cantidad di trabou ta mucho hopi y cu nan kier cuida su salud. E lo ta trahando oranan hopi largo, casi no ta drumi y pa un persona di su edad, esaki no ta sano. ‘Casi e no ta drumi y ta tuma contacto hasta den oranan di marduga’, tabata comentarionan saliendo for di su seno. Ta conoci tambe cu e funcion tabata destina pa otro persona, den e caso aki, colega di partido Mike de Meza, cu no a logra pasa screening, pa cual e no por a eherce e funcion. E ora a opta pa sr Herde asumi e funcion, mirando cu e tabata cla caba cu screening pa un funcion ministerial na Hulanda. Herde a acepta e funcion ey, cu e pensamento cu esaki tabata uno temporal. Temporal den sentido cu ora cu e situacion aclarea di sr. de Meza, Herde lo a hala un banda pa e funcion bira liber. Mientras cu fuentenan cu no sa faya e portal aki, a informa riba e ‘situacion di retiro’ di Herde, oficialmente tur hende ta keto keto riba e tema aki. 

KEN TA BIRA KICO

Mientrastanto, tempo ta coriendo y ainda publicamente, e partido berde no a informa ken oficialmente ta reemplasa prome minister Mike Eman di su cartera, aunke cu e nomber di sr Arthur Dowers ta circula como esun mas sigur pa haya e funcion. Hasta e oficina lo a cuminsa sondea personal extra pa yuda cu e funcion nobo. Na e portal aki, e mandatario actual di husticia, a bisa cu e ta atende cu esey ora cu e bira un tema, pero cu aworaki no tin solicitud pues e no ta toca e tema. Loke tambe ta bira un asunto ta si un persona cu asumi e cargo internamente, kico ta pasa cu su posicion e ora. Si e ta asumi un carga mas, of e ta retira di e funcion di Husticia completo pa bira prome minister? Esey ta nifica cu mester di un otro persona pa asumi e funcion di minister di husticia. Aki tambe, noticiacla a compronde di su fuentenan interno den e partido, cu tin un careda ta tumando lugar entre e parlamentarionan di AVP, cu lo ta campañando fuertemente pa e funcion ey. Y cu e baymento di Herde, tambe mester di mas hende pa ocupa e funcionnan ey. Nombernan cu ta sigui cay ta di entre otro Jennifer Arends Reyes, Clifford Heyliger y un otro persona mas. Nan lo ta hopi interesa pa un di e funcionan ministerial. Principalmente e ‘nobatonan’ ta mustra di no kier tuma tempo pa siña kico tur un encargo politico ta ensera, y ta pura pa bira minister. E pregunta e ora ta, si ta pa pueblo nan kier e posicion. Pero si algun di e parlamentarionan cu no tin mucho voto, bira minister, esey ta nifica cu mas hende sin experiencia lo drenta parlamento. Y mirando caba con e actual grupo a anda cu sr De Meza cu finalmente a hay’e obliga di declara su mes independiente, no tin garantia cu e lo funciona bon. Na tur, lo bin henter un stoelendans interno den partido AVP pa tanto funcion di minister como di parlamentario.