Ministerio Publico ta persigui polis pa homicidio den caso fatal di pashent psychiatrico

ORANJESTAD — Casi dies luna despues cu un homber cu problemanan di salud mental a perde su bida durante un intervencion policial dia 27 di januari 2026, Ministerio Publico (OM) a dicidi di persigui penalmente e agente policial envolvi. E polis, di inicialnan R.W.A.R., ta wordo sospecha di homicidio.

E decision aki ta marca un desaroyo importante den un caso cu desde su principio a lanta preguntanan serio tocante uso di forza policial, particularmente ora ta trata di un persona cu problema psychiatrico.

Un dia despues di e incidente fatal, Noticiacla a publica un analisis cu a pone precisamente e interrogantenan aki dilanti: e uso di arma reglamentario tabata necesario y proporcional, of por a evita e desenlace fatal?

Segun e version policial di e tempo, e homber tabata agresivo y arma cu un machete, mientras cu relato atribui na personanan cercano na e victima a presenta un otro imagen: un pashent spanta, arma cu un cuchiu di cushina. Noticiacla a indica e tempo ey cu no por a verifica independientemente e ultimo version.

PREGUNTANAN CU A KEDA

Den su analisis di 28 di januari, Noticiacla a cuestiona no solamente e momento cu e agente a uza su arma, sino tambe e circunstancianan cu a conduci na intervencion policial.

Entre otro, e analisis a plantea preguntanan tocante e rol di centro Respaldo y e FACT-team, e informacion cu polis a ricibi prome cu interveni, y si tabatin alternativanan pa maneha e situacion sin un resultado fatal.  Tambe a surgi e pregunta si Aruba mester considera uso di medionan menos letal, manera taser, durante intervencionnan cu pashentnan den crisis mental.

DI INVESTIGACION PA PERSECUCION PENAL

Cu e decision reciente di Ministerio Publico, e caso ta drenta un fase nobo. E hecho cu OM a dicidi di persigui e agente no ta nifica cu su culpabilidad a keda estableci. Esey ta un decision cu ta toca hues. E prome audiencia, un regiezitting, ta programa pa 26 di november. Durante e sesion, defensa por presenta peticionnan pa investigacion adicional, mientras cu corte lo determina e siguiente pasonan den e proceso penal. Ministerio Publico a informa famia di e fayecido tocante su decision.

Casi dies luna despues, e pregunta central cu Noticiacla a plantea inmediatamente despues di e tragedia ta keda igualmente relevante: tabata realmente necesario pa un intervencion policial cu un pashent psychiatrico termina cu uso di forza mortal?

Awor ta na husticia pa evalua e evidencia y determina si e actuacion di e agente policial tabata dentro di e limitenan di ley.