Corte ta rechasa peticion di wraking di huez pa caso di Fernandes Pedra

ORANJESTAD — Un camara di tres hues diabierna mainta a rechasa   e peticion di wraking presenta pa Chania Fernandes Pedra contra e hues penal cu ta trata e caso di e accidente fatal na brug di Renaissance, dia 4 di januari 2026, den cual dos persona a perde nan bida.

Fernandes Pedra a presenta e peticion dia 4 di november, alegando cu e no ta ricibi un tratamento imparcial durante e proceso penal. Durante e audiencia, abogado Jairon Odor, cu a representa Fernandes Pedra exclusivamente den e procedura di wraking, a presenta diferente argumento, incluyendo desacuerdo tocante investigacion adicional, acceso na dossier penal y asistencia di abogado.

Despues di aproximadamente 10 minuut di deliberacion, e tres huesnan a rechasa e peticion. Segun corte, solicitudnan pa investigacion adicional mester wordo trata durante e proceso penal regular y no den un procedura di wraking. Tambe e argumentonan tocante asistencia di abogado y acceso na dossier a wordo rechasa, pasobra nan no tabata inclui den e peticion original.

Corte a enfatisa cu un peticion di wraking mester wordo presenta inmediatamente ora surgi un motibo pa duda imparcialidad di un hues, y no despues di acumula diferente incidente.

Cu e decision aki, e caso penal contra Fernandes Pedra lo sigui dia 18 di november. E decision di wraking lo wordo formalisa por escrito.