Interupcion na planta di WEB a causa blackout na Aruba diahuebs merdia

ORANJESTAD — Aruba a experencia un blackout general diahuebs 5 november, poco despues di 2'or di merdia, cu a laga gran parti di e isla sin electricidad durante aproximadamente un ora te un ora y mei. Segun compania di distribucion di coriente ELMAR, e problema a origina pa motibo di un interupcion di suministro di electricidad na planta di WEB. Pa 2:09 di merdia, portavoz di ELMAR, Audrey Croes, a confirma cu tabatin un blackout relaciona cu e interupcion na WEB. Dos minuut despues, ELMAR a informa cu su tecniconan a sali pa posiciona na diferente substacionnan, preparando pa reestablece suministro di electricidad asina cu WEB bolbe entrega coriente.

MAS DI UN ORA SIN SUMINISTRO

Pa 3:02 di atardi, ELMAR a confirma cu e situacion ainda no a cambia. E tecniconan tabata cla pa cuminsa cu restablecimento, pero tabata depende di WEB pa bolbe suministra electricidad. Cuater minuut despues, pa 3:06, ELMAR a anuncia cu WEB a cuminsa entrega coriente bek. Inmediatamente, su tecniconan a inicia e proceso di restablecimento, cuminsando den area di Kooyman.

SUMINISTRO TA BOLBE GRADUALMENTE

Pa 3:17 di atardi, ELMAR a informa cu tres substacion tabata bek den servicio, permitiendo cu suministro di electricidad bolbe na Balashi, Santa Cruz y vecindarionan rond di e areanan aki. Na e momento ey, tecniconan tabata sigui trahando pa restablece coriente den e otro areanan di Aruba. E informacion di ELMAR ta confirma cu e interupcion a origina na suministro di WEB, pero ainda no a brinda un splicacion tecnico tocante kico exactamente a causa e problema na planta. Tampoco no tabatin confirmacion, den e ultimo actualisacion di 3:17, cu suministro di electricidad tabata completamente restableci den tur parti di Aruba.