Fernandez Pedra dilanti Corte diabierna pa caso di accidente fatal cu dos morto

ORANJESTAD — Un di e casonan penal cu mas a capta atencion publico na Aruba durante 2026 ,lo bolbe dilanti Corte diabierna 2 di oktober mainta, ora e proceso contra C. Fernandez Pedra cuminsa cu tratamento integral. E ta wordo acusa, entre otro, di homicidio di dos persona y intento di homicidio di dos otro, relaciona cu e accidente fatal riba L.G. Smith Boulevard di 4 di januari 2026.

Segun e acusacion di Ministerio Publico, Fernandez Pedra tabata stuur un Jeep Compass sin rijbewijs valido y bao influencia di alcohol. Fiscal ta sostene cu e tabata den un estado emocional, tabata core cu velocidad demasiado halto y no a adapta su velocidad na e situacion riba caminda. Tambe e ta wordo acusa di no a presta suficiente atencion na otro usuarionan di trafico, particularmente peatonnan, no a tene man drechi y no a desvia pa evita impacto.

Dos peaton, Josely Paulina Vasquez Gonzalez y Carlos David Vialez Valerio, a perde nan bida despues di e impacto. E incidente a pasa cerca di Wind Creek Casino y a causa gran conmocion den comunidad. 

Ministerio Publico ta acusa Fernandez Pedra tambe di dos intento di homicidio relaciona cu dos otro peaton cu, segun acusacion, a hera wordo gedal mientras nan tabata cruzando caminda. Subsidiariamente, fiscal a formula acusacion di intento di causa lesion corporal grave. Ademas, e dossier ta inclui acusacion di bandona lugar di accidente, core bao influencia y stuur sin rijbewijs valido.

E caso a wordo pospone anteriormente mientras investigacion adicional, entre otro tocante sistema electronico di e vehiculo y un rapport psicologico, tabata pendiente. Corte a determina anteriormente cu Fernandez Pedra mester keda deteni y cu asistencia legal efectivo ta esencial pa continuacion di e proceso.

Fernandez Pedra anteriormente a declara cu, segun e, loke a pasa tabata “un accidente terrible” y a enfatisa cu ainda no tin condena contra dje. E acusacionnan lo mester wordo proba dilanti Corte, unda e acusado ta considera inocente mientras no tin un sentencia condenatorio definitivo.