Bermudez (AVP) ta pidi claridad y accion pa Arubus y bushaltenan cu ainda no ta instala

ORANJESTAD — Parlamentario Carlos Bermudez di AVP ta pidi claridad y solucion concreto pa e situacion di Arubus, y tambe pa instalacion di bushaltenan cu, segun informacion cu e la ricibi, ya a yega Aruba pero ainda no a wordo instala.

Durante conferencia di prensa semanal di fraccion di AVP, Bermudez a anuncia cu e lo rappel Minister di Transporte Arthur Dowers riba preguntanan cu e a manda anteriormente tocante Arubus. Tambe e a presenta un peticion pa invita Arubus na Parlamento pa parlamentario por ricibi informacion directamente tocante e situacion y e pasonan necesario pa yega na un solucion.

Segun Bermudez, e problema di Arubus no ta nobo y ta canando pa algun aña caba. E a indica cu Gobierno anterior a laga un debe miyonario habri na compania y cu ta importante pa e discusion no keda solamente riba deuda, pero conduci na accion concreto pa evita cu e situacion sigui empeora.

E parlamentario a enfatisa cu e problema no ta afecta solamente empleadonan di Arubus, sino tambe tur usuario cu ta depende di transporte publico diariamente.

Bermudez a toca tambe e tema di bushaltenan. Segun dje, e kier sa pakico nan ainda no a wordo instala, especialmente mirando cu tin usuario cu mester warda bus den solo sin proteccion suficiente.

E a bisa cu e lo sigui duna siguimento tanto na e situacion di Arubus como na instalacion di e bushaltenan, cu e meta pa logra paso concreto y mehoramento pa empleadonan y usuarionan di transporte publico.