Fayo tecnico na Merca a cancela varios buelo pa Aruba

ORANJESTAD — E fayo grandi den sistema di telecomunicacion di control di trafico aereo den nordeste di Merca tambe a afecta buelonan entre Newark y Aruba.

Segun informacion di vuelo di Aeropuerto Internacional Reina Beatrix, dos vuelo di United Airlines cu mester a sali Newark pa Aruba — UA1040 y UA1042 — a wordo cancela. E vuelo UA1039 di Aruba pa Newark tambe a wordo cancela, mientras UA1043 pa Newark a wordo posponi di 4:30 pa 7:00 di anochi.

Vuelonan entre Aruba, New York JFK y Boston no a sufri cancelacion. JetBlue B62173 for di Boston, JetBlue B6057 y Delta DL613 for di JFK a yega Aruba hasta prome cu nan orario programa. E vuelonan di regreso pa Boston y JFK tambe a sali practicamente na ora.

E problema a cuminsa cu un circuito principal defectuoso na centro di control aereo na Philadelphia. Ora sistema mester a cambia pa e conexion di reserva, autoridadnan a descubri cu un cuadrilla di construccion di Amtrak a corta e kabel di fibra optica accidentalmente.

FAA a suspende trafico temporalmente na Philadelphia, Newark, JFK, LaGuardia y Boston Logan. Mas cu 5.600 vuelo a wordo retrasa of cancela y mas cu 100 avion mester a desvia pa otro aeropuerto.

Pasaheronan cu ta biaha entre Aruba y Estados Unidos ta wordo recomenda pa controla status di nan vuelo directamente cu aerolinea prome cu bay aeropuerto.