Miembro di Tweede Kamer Heera Dijk ta honra Corsou riba su prome Prinsjesdag

DEN HAAG — Parlamentario Hulandes Heera Dijk di D66 a marca su prome Prinsjesdag cu un tributo special na su raisnan di Corsou, combinando den su vestuario e dos portafolionan cu e ta representa den Tweede Kamer: Relacionnan di Reino y Arte y Cultura.

Dijk a presenta na Prinsjesdag cu un diseño special di e artista y diseñador Curazoleño David Paulus. Segun e parlamentario, su vestuario ta un oda na su origen como “yu di Kòrsou” y na “The Blue Wave”.

Cu e escogencia aki, Dijk a pone identidad y cultura Caribeño visiblemente den centro di uno di e dianan politico mas importante na Hulanda. Prinsjesdag ta marca apertura di e aña parlamentario y ta e momento cu Gobierno Hulandes presenta su plan y presupuesto pa e siguiente periodo.

Riba su cuenta di Instagram, Dijk a describi su prome Prinsjesdag como un dia particular cu el a disfruta hopi. E parlamentario tambe a dedica un momento emocional na su mama falleci.

“Mi a pensa hopi riba bo awe, mama. Mi sa cu lo bo tabata masha orguyoso di esaki. Nos ta sinti bo falta,” el a scirbi.

Su tata y su ruman tabata presente pa comparti e momento importante. Dijk a califica nan sosten durante e dia como algo “cu no tin prijs”.

Heera Dijk ta miembro di Tweede Kamer pa D66 y ta ocupa su mes cu Relacionnan di Reino, Arte y Cultura. Su aparicion na Prinsjesdag a transforma moda den un mensahe politico y cultural: un expresion visible di e conexion entre Hulanda y Caribe Hulandes. Tweede Kamer⁠, D66⁠