CAft: Gobierno mester demostra capacidad pa ehecuta inversionnan di Algemeen Investerings- en Ontwikkelingsfonds

ORANJESTAD — E fondo di inversion (AIOF) por bira un instrumento importante pa desaroyo di Aruba, pero Gobierno mester demostra cu e tin capacidad pa transforma e placa disponibel den proyectonan concreto.

Esaki ta un di e puntonan cu Marion Agunbero, representante di Aruba den College Aruba Financieel Toezicht (CAft), a destaca durante un entrevista recien cu Noticiacla.

Segun Agunbero, CAft durante añanan a insisti riba necesidad di un plan integral di inversion. Awor cu Gobierno a avansa cu e planificacion, e siguiente desafio ta su ehecucion. "Un di e elementonan cu nos a haya ta e capacidad pa ehecuta proyecto", Agunbero a indica.

El a splica cu e aparato gubernamental mester prepara su mes mihor pa formula, organiza y ehecuta proyectonan di inversion. Esaki ta exigi no solamente placa, sino tambe un cambio den manera di planifica y traha.

Agunbero a enfatisa cu Aruba tin necesidad urgente di inversion, particularmente den infraestructura. Sinembargo, disponibilidad di fondo no ta garantisa cu e proyectonan lo wordo realisa na tempo.

E mensahe principal ta cu Gobierno awor mester pasa di planificacion pa ehecucion, cu suficiente capacidad tecnico y administrativo pa entrega resultado concreto na comunidad.