Gobierno Hulandes ta extende Landspakketten cu dos aña te 2029

DEN HAAG — Gobierno Hulandes ta haci posibel pa extende cu dos aña e cooperacion entre Hulanda, Aruba, Corsou y Sint Maarten bou di e Landspakketten. E regeling cu ta forma base di e acuerdonan lo por sigui te cu final di 2029. Esaki a keda publica diamars riba Prinsjesdag.  E cuater paisnan ta traha desde 2021 riba reforma structural pa, entre otro, fortalece economia, finansa publico, gobernacion y enseñansa.

Mas trempan e aña aki, un comision independiente a conclui cu e reformanan ta necesita mas tempo pa por wordo ehecuta debidamente. Pa e motibo ey, Gobierno Hulandes a opta pa extende e cooperacion cu dos aña.

Pa financia e periodo adicional, €30,9 miyon lo wordo pasa di presupuesto di 2027 pa 2028 y 2029. Di e suma ey, €21,3 miyon ta destina pa 2028 y €9,6 miyon pa 2029.

E decision ta nifica cu e Landspakketten, cu inicialmente tabata acerca nan fecha final, lo sigui como base pa cooperacion y reforma dentro di Reino te por lo menos 2029.