Parlamento Hulandes ta exigi consulta cu Aruba, Corsou y Sint Maarten

DEN HAAG — Comision pa Koninkrijksrelaties di Tweede Kamer Hulandes ta presiona gabinete Jetten pa restablece un sistema cla di consulta cu Aruba, Corsou y Sint Maarten ora Reino Hulandes  tuma decisionnan cu por afecta e paisnan Caribeño directamente.

E comision a pidi Secretario di Estado pa Koninkrijksrelaties Eric van der Burg pa duna un reaccion urgente riba preocupacionnan expresa door di e tres paisnan y pa presenta un propuesta concreto pa mehora e procedimiento di consulta.

E conflicto a cuminsa despues cu Reino Hulandes na maart a dicidi pa no vota riba un resolucion di Nacionan Uni  relaciona cu trata transatlantico di esclabonan Africano y esclabitud, sin consulta Aruba, Corsou y Sint Maarten previamente.

E tres paisnan a considera esaki particularmente serio, mirando nan historia directo cu  sclabitud.

Durante un consulta tripartito na Den Haag dia 4 di juni, delegacionnan parlamentario di Aruba, Corsou y Sint Maarten a aproba un resolucion conhunto criticando e falta di consulta. Segun nan, e caso ta mustra un problema democratico mas amplio den Reino, especialmente den politica exterior cu ta afecta e islanan directamente.

Awor e asunto a yega na Tweede Kamer mes. E comision Hulandes no kier solamente un splicacion tocante e caso di  sclabitud, pero un solucion structural pa evita cu e mesun problema ta ripiti.

Si un sistema nobo wordo introduci, Aruba, Corsou y Sint Maarten por haya un rol mas cla prome cu Reino Hulandes determina su posicion internacional riba temanan cu ta toca nan directamente.

Van der Burg mester awor explica con gabinete Hulandes kier garantisa cu e tres paisnan Caribeño wordo consulta prome cu decisionnan di Reino wordo tuma.