Un di cada cuater pregunta parlamentario Hulandes tin rastro di AI

DEN HAAG — Aproximadamente un di cada cuater set di pregunta parlamentario presenta den Tweede Kamer Hulandes tin rastro di inteligencia artificial, segun un investigacion di NOS basa riba 2.500 documento cu mas cu 28.000 pregunta individual.

E uso di AI ta aumentando. Durante e ultimo seis luna, 26 porciento di e preguntanan parlamentario a mustra señal di AI, compara cu 17 porciento den e seis luna anterior.

E manera cu AI ta wordo usa ta varia. Den algun caso e tecnologia ta yuda formula of afina algun pregunta, mientras cu otro texto, segun detector di AI Pangram, por ta genera casi completamente door di AI.

Expertonan ta bisa cu uso di AI no necesariamente ta problema, mientras cu e parlementario mes ta keda responsable pa contenido y ta verifica e informacion. AI por yuda busca documento, resumi informacion y formula pregunta mas rapido.

Pero tin tambe riesgo. Si un parlementario no domina un dossier y entrega demasiado di e proceso di pensamento na AI, e por termina usa informacion incorecto of perde profundidad den su propio investigacion.

Algun parlementario ya a confirma cu nan ta usa AI. Nan ta bisa cu e ta sirbi principalmente pa investigacion, simplificacion di texto, ortografia y formulacion, pero cu nan mes ta determina y controla e contenido final.

Expertonan tambe ta adverti cu detectornan di AI no ta infalibel. Un texto humano cu ta skirbi den un estilo similar na AI por wordo marca como texto genera door di AI.

E debate, pues, no ta solamente si parlamentario ta usa AI, pero principalmente cuanto di e pensamento politico y democratico nan ta laga den man di e tecnologia.