Herdé: Reorganisacion mester sigui pa beneficio di Aruba

ORANJESTAD – Durante entrevista cu Tito Laclé den Noticiacla LIVE, Minister René Herdé a enfatisa cu e trabou den Gobierno no ta limita solamente na ehecucion di programa di gobernacion, sino cu tambe ta inclui un proceso amplio di reorganisacion y mehoracion di diferente sistemanan cu actualmente no ta funciona manera mester.

Herdé a indica cu tin diferente area unda Gobierno mester pone orden y busca solucion, particularmente den infraestructura y procedimentonan administrativo. Segun e, e meta mester ta pa logra resultado cu ta bon pa Aruba y no pa favorece interes partidista, famia of amigo.

“Mi no ta haci nada partidista pa favorece famia, amigo ni nada,” Herdé a expresa durante e entrevista. El a agrega cu su prioridad ta mira kico no ta funcionando pa pueblo y busca manera pa coregi esaki.

Tito Laclé a puntra e minister si e tin garantia cu, independientemente di loke pasa politicamente, e trabou cu a cuminsa por continua. Herdé a laga compronde cu continuidad ta importante, particularmente ora ta trata di cambionan cu tin beneficio directo pa Aruba.

Entre e problemanan menciona durante e conversacion tabatin tardansa den proceso di drenamento di tereno, permit di construccion y automatizacion di diferente sistema gubernamental. Herdé a indica cu esakinan ta ehempel di areanan unda ta necesario pa sigui modernisa y kita obstaculonan cu ta causa demora pa ciudadano y empresa.

Segun e minister, si un proceso a cuminsa y ta produci algo positivo pa Aruba, e prioridad mester ta pa sigui cu ne, independientemente di cambio politico of personal.