Seminario regional ta uni Caribe den prevencion di suicidio

WILLEMSTAD — Federacion Dutch Caribbean Mental Health (DCMH) a organisa un seminario regional na University of Curaçao, enfoca riba cooperacion y intercambio di conocemento pa fortalece prevencion di suicidio den Caribe.

E evento, bou di lema Together in Prevention, Together in Hope, a reuni 122 participante fisicamente, mientras otro interesadonan di diferente isla y pafor di Caribe a sigui e programa via livestream.

Specialistanan a papia tocante prevencion di suicidio for di un perspectiva global y local, salud mental entre hobennan y e resultadonan di Regiobeeld GGZ CAS-BES 2025. Durante workshopnan interactivo, participantenan a trata temanan manera gruponan vulnerabel, prevencion na scol y reconocemento temprano di señalnan di riesgo.

Famia y sernan keri cu a perde un persona pa suicidio tambe a comparti nan experiencia. Nan relato a enfatisa e importancia di reconoce señalnan na tempo, papia abiertamente tocante salud mental y mehora cooperacion entre famia, scol, profesionalnan di cuido, organisacionnan y Gobierno.

Segun DCMH, prevencion di suicidio no mester keda limita na un solo dia. E ta exigi atencion continuo, menos stigma y un esfuerzo conhuntamente di henter comunidad.

E presentacionnan di mainta por wordo mira bek via Vimeo. E enlace ta disponibel riba e paginanan di Respaldo na Facebook y LinkedIn.