Gobierno ta usa deposito di SVb pa refinancia debe na costo mas abao

ORANJESTAD — Gobierno di Aruba y Sociale Verzekeringsbank (SVb) a firma un areglo di deposito di Afl. 50 miyon, cu un duracion di 36 luna y un interes di 3% pa aña. E fondo lo wordo uza pa refinancia obligacionnan estatal cu ta vence, y no pa cubri gastonan nobo.

E posibilidad pa uza surplus temporal di SVb y AZV ta ancra den Landsverordening Aruba tijdelijk financieel toezicht (LAft) desde 2024. CAft a recomenda Gobierno uza e fondonan aki pa limita prestamonan mas caro y reduci gastonan di interes.

SVb ta mantene derecho riba e suma deposita, ta ricibi interes y lo haya e Afl. 50 miyon completamente bek na final di e periodo. Segun Gobierno, e deposito ta sali for di un surplus temporal cu SVb no tin mester pa cubri su prestacionnan y gastonan durante e proximo tres añanan.

Minister Geoffrey Wever ta enfatisa cu e areglo no ta crea espacio presupuestario pa gasto adicional. E ta reemplasa parti di e financiamento publico ya aproba pa Parlamento cu un opcion menos costoso. Parlamento a ricibi copia di e acuerdo y di e conseho di CAft.