Wever na Laclé riba proyecto Lagoon: “E biaha aki si mi ta convenci cu nos lo logra”

ORANJESTAD – Durante un reciente edicion di Noticiacla LIVE, periodista Tito Laclé a confronta Minister di Economia Geoffrey Wever cu un pregunta skerpi: pakico pueblo mester kere cu e biaha aki e proyecto pa renoba e ex pompstation Esso Lagoen realmente lo bira realidad, ora den un gabinete anterior ya a wordo anuncia un proyecto pa e mesun edificio y finalmente nada no a materialisa? E pregunta no ta pone responsabilidad di e proyecto anterior riba Wever, kende no tabata forma parti di e gabinete anterior di Mike Eman, pero si ta pone e actual Gobierno dilanti di e historial di un propiedad cu ya a wordo presenta anteriormente como oportunidad di revitalisacion.

KICO TA DIFERENTE E BIAHA AKI

Laclé a puntra Wever kico ta diferente e biaha aki y pakico Aruba mester kere cu e plan actual lo yega mas leu cu e anterior. Wever a reconoce cu e no por indica exactamente pakico e proyecto anterior no a continua. “Nos no sa exactamente kico por a pasa pa e proyecto no a continua e tempo ey. Mi ta compronde cu tabatin un cambio di cooperacion y otro circunstancianan cu posiblemente a influencia e decision. Pero na e momento aki mi no tin un motibo specifico cu mi por menciona.”

E PROYECTO TA REALISABEL? 

Ora Laclé a puntr’e si e ta kere cu e proyecto actual por wordo realiza, Wever a contesta cu conviccion. “Sí. Mi ta completamente convenci cu e ta un proyecto factibel.” Segun e minister, e diferencia principal ta cu e propiedad no ta wordo mira como un proyecto aisla. Gobierno ta conecta e plan cu un renovacion mas amplio di e area di Columbusstraat y Wilhelminastraat. “E biaha aki nos lo renoba henter e area di Columbustraat, for di parking lot di El Gaucho te na cerca di Circa Tanchu. Henter e area lo haya un renobacion.”

ZONA ATRACTIVO

Wever a bisa cu e zona durante hopi tempo a keda atras y cu Gobierno kier haci e area atractivo atrobe. E ta mira specialmente potencial den Wilhelminastraat, caminda ya tin varios restaurant y caminda e ex pompstation por incorpora den un desarrollo culinario mas amplio. “E ubicacion ta unico. Ta un sitio bunita, e edificio tin balor historico y mi ta sigur cu un proyecto asina lo contribui na diversidad y revitalisacion di centro di ciudad.” Otro elemento cu Wever ta considera diferente, ta e procedimiento formal pa scoge un desarroyador. Segun e mandatario, Gobierno ta siguiendo e procedimiento conforme cu e llamado Didam-arrest, cu ta exigi cu propiedad publico wordo poni riba mercado di manera transparente.

Interesadonan tin te 18 di september pa entrega nan proposicion. Despues, un comision lo evalua tur e ofertanan, e envelopenan lo wordo habri den presencia di un notario y cada proposicion lo haya su puntuacion. “Despues, un comision lo evalua tur e proposicionnan. E envelopnan lo wordo habri den presencia di un notario.” Segun Wever, dentro di aproximadamente cuater siman despues di e fecha final, e comision lo presenta su recomendacion y Gobierno por sigui cu e proceso pa otorga e derecho di erfpacht.

TIMELINE

Laclé a sigui presiona riba e calendario y a puntra con lihe e proyecto realmente por materialisa. Wever a indica cu e proceso lo tuma mas tempo cu solamente e evaluacion inicial. “Realisticamente, e otorgamento formal di erfpacht posiblemente por tuma luga rond di mitar di e proximo aña.” E intercambio riba Noticiacla LIVE a pone e foco riba e punto central: e proyecto tin un proceso mas formal y un plan mas amplio e biaha aki, pero Gobierno ainda mester demonstra cu e anuncio lo transforma den ejecucion. Despues cu un iniciativa anterior pa e mesun edificio no a materialisa, e reto pa e actual Gobierno ta no solamente presenta un proyecto atractivo, sino proba cu e biaha aki e plan realmente lo sali for di papel.