SEPPA ta exigi fondo pa acuerdo laboral nobo na Arubus

ORANJESTAD – Sindicato SEPPA ta aumenta presion riba Gobierno pa pone fondo disponibel pa Arubus NV, pa e compania por continua negociacionnan pa un contrato colectivo nobo cu su trahadornan. Secretario general di SEPPA, Magaly Brito, ta acusa Gobierno di celebra resultado financiero y surplus, mientras trahadornan di transporte publico ta sigui warda riba mehoracion di nan condicionnan laboral.

Segun Brito, e prome ronda di negociacion pa un posible contrato colectivo nobo ya a tuma lugar, pero te awor no tin avance concreto. E ta indica cu inicialmente Raad di Comisario a manda sindicato negocia cu gerencia di Arubus. Despues di e negociacionnan ey, gerencia segun SEPPA a laga compronde cu sin fondo adicional for di Pais Aruba, como unico accionista, no tin espacio pa yega na un acuerdo.

“Pais Aruba ta e doño di Arubus NV y tin un compromiso etico y moral pa cu trahadornan di Arubus,” Brito ta declara. Segun e lider sindical, Gobierno no por sigui laga e responsabilidad circula entre Raad di Comisario, gerencia y accionista sin cu finalmente un decision wordo tuma.

SEPPA ta dirigi su exigencia directamente na Minister Arthur Dowers, kende ta encarga cu transporte publico y Arubus. Sindicato ta pidi pa Gobierno cumpli cu compromisonan cu, segun Brito, ya a wordo expresa anteriormente.

Brito ta referi specificamente na un carta di 2 di december 2024 di e tempo ey minister Urvin Arends, y na cartanan di Minister Dowers di 8 di september y 1 di october 2025. Segun SEPPA, e compromiso pa pone fondo disponibel mester awor wordo converti den accion concreto.

E sindicato ta sostene cu trahadornan di Arubus ta sinti nan mes trata diferente compara cu otro empleadonan den servicio publico. “Tur otro trahador cu ta brinda servicio publico a haya ahustacionnan. Ta solamente esnan di transporte publico no a haya nada,” Brito ta bisa.

Pa SEPPA, e asunto no ta solamente financiero, sino tambe un cuestion di derecho y trato husto. Brito ta sostene cu trahadornan di Arubus ta percura diariamente pa transporte publico sigui funciona y pa entrada drenta den compania, mientras nan mes ta keda warda riba condicionnan di trabou cu sindicato ta considera husto.

E lider sindical tambe a critica e contraste entre discurso politico riba presupuesto y surplus y realidad cu cierto trahadornan ta sinti. “Politiconan ta broma cu Presupuesto, cu Surplus,” Brito ta declara, agregando cu e resultado financiero no mester tapa e presion cu trabajador ta experimenta.

SEPPA ta exigi pa Gobierno, como unico accionista di Arubus, asumi su responsabilidad y crea e espacio financiero necesario pa negociacion por continua.

Brito a cera su declaracion cu un mensahe directo: trahadornan di Arubus tambe por “klap man”, pero segun dje, nan no tin motibo pa celebra mientras nan reclamonan laboral ta keda sin solucion.