American Airlines ta mehora cabina; por beneficia pasaheronan di Aruba

MIAMI - American Airlines ta preparando un modernisacion grandi di e experiencia abordo mientras e ta competi pa pasaheronan cu ta busca mas comfort y servicio premium. E compania a anuncia cu mas di 800 avion narrowbody finalmente lo haya sistema nobo di entretenimiento cu pantalla 4K, Bluetooth y carga USB-C.

Ademas, American lo amplia cantidad di asiento premium, manera first class y Main Cabin Extra. Actualmente, alrededor di 25% di su asientonan den e tipo di avionnan aki ta premium; den e añanan venidero, e porcentaje lo subi pa cerca di 40%.

American tambe tin plan pa instala Wi-Fi lihe via Starlink for di 2027. Avionnan nobo cu e pantayanan nobo lo cuminza yega den segunda mitar di 2028, mientras adaptacion di avionnan existente lo cuminsa mas laat e mesun aña y sigui te prome añanan di 2030.  

Pa Aruba, esaki por ta relevante, pasobra American Airlines ta un aerolinea importante pa conexionnan cu nos isla. Aunke e compania no a specifica cua ruta lo haya e cambionan prome, pasaheronan cu ta bula cu American pa y for di Aruba eventualmente por beneficia di un experiencia mas moderno y mas premium.