PPA ta duna Gobierno 48 ora pa mustra prueba di destaho di ATA

ORANJESTAD – Fraccion di PPA ta aumenta presion riba Gobierno pa presenta prueba cu procedimento legal a wordo sigui den otorgamento di un contrato di aproximadamente Afl. 2.1 miyon pa aña pa maneho di desperdicio, financia via Aruba Tourism Authority (ATA).

Parlamentario Eduard Pieters ta exigi documentacion cu comproba un destaho publico, e Ministeriële Beschikking cu eventualmente a instrui ATA pa financia e proyecto y, si e documentonan no por wordo presenta, un splicacion di con Gobierno lo drecha e situacion.

PPA a manda un carta na Conseho di Minister dia 5 di augustus y inicialmente a duna Gobierno shete dia laboral pa contesta. Segun Pieters, no a bin ningun reaccion. P’esey PPA a manda un recordatorio y a concede un termino adicional di 48 ora.

Pieters ta basa su cuestionnan principalmente riba articulo 20 y 21 di Landsverordening Instelling Aruba Tourism Authority. E ta sostene cu, si Gobierno ta afirma cu e contrato a wordo otorga correctamente, mester por presenta e evidencia correspondiente.

PPA tambe ta cuestiona dicon Serlimar no a haya oportunidad pa brinda e servicio, considerando cu, segun Pieters, e compania publico a indica cu dentro di aproximadamente cuater siman lo por dispone di e containernan necesario.

Pieters a enfatisa cu PPA no ta contra limpieza di Aruba ni contra un compania specifico, pero cu fondo publico mester wordo usa conforme ley. “E fin no ta hustifica e medio,” el a declara, agregando cu Parlamento no por permiti cu posible desviacion di ley bira algo normal.