Gobierno ta coordina apoyo pa Arubianonan na Colombia despues di temblor

ORANJESTAD – Gobierno di Aruba a reuni dialuna merdia cu diferente instancia y experto pa evalua e situacion despues di e temblor fuerte cu a afecta Colombia mainta y pa inventarisa con esaki por a afecta ciudadanonan di Aruba cu actualmente ta bishitando of ta permanece den e pais.

Prome Minister Mike Eman a reuni cu Juri Nicolaas di DBB, Irma Gordon di KPA, Rino Hermans y Rene Ridderstaat di CMO, experto den geologia Armando Curet, y secretario general di Ministerio di Asunto General Robert Candelaria.

Gobierno ta indica cu Aruba ta solidarisa cu comunidad Colombiano durante e momentonan dificil aki y ta sigui monitorea e situacion, mientras ta busca pa haya un imagen mas cla di posible Arubanonan cu por tin necesidad di asistencia.

Pa ciudadanonan cu ta na Colombia y tin necesidad di contacto of asistencia, Gobierno a comparti e siguiente informacion:

Embajada di Reino Hulandes na Bogota: +57 60 16 38 42 00

WhatsApp: +31 857 737 400

Consul Honorario di Reino Hulandes na Cali: +57 26 66 16 63

Email: consulaatcali@vdl.com.co

Embajada na Bogota ta situa na Carrera 13 No. 93-40, Piso 5, mientras Consulado Honorario na Cali ta na Calle 5 No. 38-25, Edificio Plaza San Fernando, Oficina 504.

Gobierno di Aruba ta sigui monitorea e situacion y lo coordina cu e instancianan concerni si asistencia adicional ta necesario.