Gobierno lo multa supermercado cu no cumpli cu Ley di Prijs

ORANJESTAD – Entrante 15 di augustus 2026, Gobierno di Aruba lo cuminsa oficialmente cu e supervision di e Ley di Prijs, cu tin como meta pa tur comerciante respeta prijsnan maximo di canasta basico.

Departamento di Asuntonan Economico, Comercio y Industria (DEACI) lo ta encarga cu e control, verificando cu e prijsnan di e productonan esencial no pasa e maximo permiti y cu tur articulo den supermercadonan tin un prijs claramente indica.

Conforme e cambionan den e Ley di Prijs, supermercadonan y distribuidornan mayoritario cu no ta respetando e prijsnan maximo of cu no ta indica prijsnan correctamente, por enfrenta medida administrativo, incluyendo un Last Onder Dwangsom of un boete.

Controladornan di DEACI lo sigui haci inspeccionnan rutinario y tambe actua riba kehonan di consumidor, cu e meta di proteha poder di cumpra di comunidad y garantisa cumplimiento di e ley.