DIMP ta habri autorizacion pa yudansa cu declaracion di impuesto

ORANJESTAD – Departamento di Impuesto a anuncia cu contribuyentenan awor por autorisa un persona di confianza, accountant of consehero fiscal pa yuda cu nan proximo declaracion di inkomstenbelasting via e portal BO impuesto (BOi), aun prome cu e formulario oficial bira disponibel na november.

E funcionalidad nobo ta permiti usuario duna acceso anticipadamente na e formulario di inkomstenbelasting, facilitando cu e declaracion por wordo prepara mas eficientemente una vez cu e temporada di declaracion cuminsa.

Departamento di Impuesto ta enfatisa cu solamente personanan di confianza mester ricibi autorizacion. Contribuyentenan no mester comparti nan username ni password, pasobra e credencialnan ta estrictamente personal.

Via e portal, usuario por determina exactamente pa cua servicio un persona ta haya acceso y por revoca e autorizacion na cualkier momento.

Cu e digitalisacion di e proseso, formulario di papel y carta di autorizacion oficialmente ta bira cos di pasado. Autoridadnan ta anima tur persona cu ainda no tin un account di BOi pa registra prome cu e periodo di declaracion cuminsa.