DVG: Adictonan bou curatela lo haya tratamiento specialisa na Corsou

ORANJESTAD – Gobierno di Aruba a pone oficialmente   un programa cu lo permiti personanan cu adiccion cu ta of ta wordo poni bou curatela di un hues haya tratamento residencial specialisa na Stichting Brasami na Corsou den marcha. 

E iniciativa ta sigui e firma di un convenio entre Gobierno di Aruba y Stichting Brasami y ta yena un necesidad importante, pasobra e tipo di cuido obligatorio actualmente no ta disponibel na Aruba.

E programa no ta destina pa tur persona cu adiccion, sino exclusivamente pa casonan cu un hues determina cu un tratamento intensivo y obligatorio ta necesario. Prome cu un persona wordo acepta, un comision special lo evalua cada caso.

E tratamento na Brasami ta dura seis luna y ta consisti di cuatro fase: detoxificacion, creacion di stabilidad, tratamento intensivo y preparacion pa reintegracion. E ultimo fase lo sigui na Aruba, unda diferente partnernan local lo brinda acompañamento pa facilita recuperacion y reintegracion den comunidad.

Durante e reunionnan preparatorio, diferente instancia di salud y husticia a coordina proceduranan y responsabilidadnan pa garantisa cu e programa por funciona di un manera integra entre Aruba y Corsou.

Segun Directie Volksgezondheid, e cooperacion ta representa un paso importante pa fortalece e cadena di cuido pa personanan cu adiccion y brinda nan un oportunidad real pa recupera.