Pieters(PPA) ta sigui exigi claridad riba 16 miyon florin di ATA

ORANJESTAD – Parlamentario Eduard Pieters di Partido Patriotico Arubano (PPA) ta sigui pidi claridad tocante e destino di 16 miyon florin cu ta reserva den e Corporate Plan & Budget 2026 di Aruba Tourism Authority (ATA) bou di e rubrica "Government Development." Segun Pieters, Gobierno ainda no a splica na Parlamento ni na pueblo con e fondo lo wordo uza.

Pieters ta bisa cu ATA a wordo crea pa promove y fortalece turismo, y e ta cuestiona si e institucion no ta desviando di su mision original door di reserva fondo pa proyectonan cu normalmente ta responsabilidad di diferente ministerionan. El a adverti cu, si e practica aki continua, ATA por caba financia otro tipo di proyectonan gubernamental cu no tin relacion directo cu turismo.

PPA a manda un carta formal na Conseho di Minister pidiendo tur documentacion relaciona cu e base legal, e proceso y e decisionnan cu a conduci na e reserva di e 16 miyon florin. Segun Pieters, e peticion no ta busca confrontacion politico, sino transparencia y confirmacion cu tur decision a wordo tuma conforme ley.

E parlamentario a enfatisa cu Parlamento tin e deber di controla con ta uza placa publico. El a bisa cu transparencia no ta un opcion, sino un obligacion, y cu pueblo tin derecho di sa unda e placa di ATA ta bay y con e decisionnan financiero ta wordo tuma.