Wever-Croes(MEP): HOFA tin tres problema constitucional serio

ORANJESTAD – Lider di Fraccion di MEP, Evelyn Wever-Croes, ta bisa cu un analisis prepara pa dos profesor hulandes di derecho constitucional ta crea pregunta serio riba e propuesta di Ley di Reino HOFA. Segun Wever-Croes, e estudio ta presenta tres argumento principal cu, segun e, ta debilita e base constitucional di e ley.

Prome, e ta argumenta cu e supervision financiero di HOFA no tin un fin garantisa den ley. Maske e ta wordo presenta como temporal, Aruba no tin garantia legal cu e supervision lo termina, paso e decision final ta den man di Rijksministerraad.

Di dos, Wever-Croes ta sostene cu Articulo 38 ta contra e sistema constitucional di Reino, paso e ta duna Rijksministerraad poder cu, segun e analisis, no ta coresponde cu su tarea constitucional. El a bisa cu esaki por crea un precedente pa mas intervencion den asuntonan autonomo di Aruba.

Como di tres punto, e ta cuestiona si realmente por papia di un consenso liber. Segun e estudio, Aruba tabata negocia bou di presion financiero, mientras un acuerdo firma pa un gobierno anterior no por obliga futuro gobiernonan ni Parlamento.

Wever-Croes a conclui cu e argumentonan huridico y academico aki mester forma parti central di e debate parlamentario, y a alerta cu aproba HOFA den su forma actual por afecta autonomia, constitucion y legitimidad democratico di Aruba.