Beach.com: Eagle Beach ta entre e 10 mihor beach di mundo

ORANJESTAD – Aruba a logra otro reconocemento internacional despues cu Eagle Beach a wordo clasifica como e di 10 mihor playa di mundo, segun un estudio publica pa Beach.com. E reconocemento ta pone Aruba den e elite mundial di destinacionnan di playa y ta confirma e atractivo continuo di e isla pa turista di tur parti di mundo.

E ranking ta inclui 25 playa reparti riba 14 pais y cuater continente. Entre e 25 mihor beach, solamente tres ta situa den Merca continental, mientras cu Eagle Beach ta e unico beach di Aruba cu a logra un puesto den e top 10.

Beach.com a evalua cada beach a base di diferente criterio, incluyendo calidad di awa, accesibilidad, popularidad, clima, opinion di expertonan y feedback di bishitantenan.

E lista ta wordo lidera pa Trunk Bay na St. John, Islanan Virgin di Merca, sigui pa Elafonissi Beach na Grecia y Grace Bay Beach na Turks & Caicos.

E hecho cu Eagle Beach ta ocupa e di dies puesto mundial ta fortalece e reputacion di Aruba como uno di e destinacionnan di playa mas prestigioso den Caribe y den mundo.

Top 10 mihor playa di mundo

Trunk Bay – St. John, U.S. Virgin Islands

Elafonissi Beach – Grecia

Grace Bay Beach – Turks & Caicos

Flamenco Beach – Puerto Rico

Golden Horn Beach – Croacia

Palolem Beach – India

Sandy Point National Wildlife Refuge – St. Croix, U.S. Virgin Islands

Playa Balandra – Mexico

Praia da Falésia – Portugal

10. Eagle Beach – Aruba