Gobierno ta stop proceso di subasta pa proyecto ferry Aruba-Corsou

ORANJESTAD – Gobierno di Aruba a dicidi di stop e proceso di subasta pa e proyecto di un conexion di ferry entre Aruba y Corsou oficialmente. Segun un publicacion oficial di 29 di juli 2026, e decision a wordo tuma despues cu e ofertanan ricibi, tabata mas cu 20% ariba e presupuesto calcula pa e proyecto. E anuncio, publica door di Ministerio di Finansa, Asuntonan Economico y Sector Primario, pa medio di Direccion di Asuntonan Economico, Comercio y Industria (DEZHI), ta indica cu, di acuerdo cu e ley di aanbesteding, e subasta mester wordo termina ora e ofertanan supera e limite financiero permiti. E subasta tabata busca un firma consultor cu lo analiza si un servicio regular di ferry entre Aruba y Corsou ta factibel, tanto tecnicamente como financieramente. Ademas, e consultor lo tabata prepara y guia un futuro proceso pa selecciona e compania cu finalmente lo opera e ferry.

PROYECTO NO A WORDO CANCELA

E decision pa stop e subasta no ta significa automaticamente cu e proyecto di ferry a wordo cancela. Loke e gobierno a confirma ta cu solamente e proceso actual pa contrata e firma consultor a wordo termina. Na december 2025, Aruba y Corsou a anuncia e iniciativa como un proyecto importante pa fortalece cooperacion regional, turismo, comercio y transporte entre e dos paisnan. E prome fase di e proyecto tabata ricibi apoyo financiero di Reino Hulandes.

CONSECUENCIANAN PA ARUBA

Cu e subasta a wordo stop, ta probable cu e proyecto lo sufri un retraso. Segun e plan original, durante 2027 mester tabata wordo selecciona e operador cu lo maneha e ferry. Sin e consultor, e siguiente fasenan dificilmente por sigui den e tempo originalmente plania. Esaki kier men cu Aruba lo sigui depende principalmente di conexionnan aereo cu Corsou. Gobierno di e dos paisnan tabata mira e ferry como un alternativa pa baha costo di biahe, aumenta movilidad entre e islanan y crea mas oportunidadnan pa turismo y comercio.