Eman: Aruba por bira centro di conocemento pa Latino America

ORANJESTAD/ PERU – Prome Minister Mike Eman ta mira un futuro caminda Aruba no solamente ta destaca como destino turistico, sino tambe como un centro di conocemento y innovacion pa Latino America. Durante su bishita oficial na Peru, e vision aki a haya interes amplio, especialmente despues di e reciente acuerdo firma cu Wageningen University & Research (WUR).

Segun Eman, Aruba por sirbi como un brug entre Reino Hulandes y Latino America, exportando conocemento, servicio profesional y solucionnan sostenibel den area manera agricultura, maneho di awa, biodiversidad y adaptacion na cambio climatico.

E acuerdo cu Wageningen ta explora e posibilidad pa establece un presencia permanente di e instituto na Aruba. Eman ta bisa cu esaki por habri caminda pa investigacion, cooperacion regional y apoyo tecnico na paisnan manera Peru, cu ta enfrenta retonan relaciona cu cambio climatico y agricultura.

Prome Minister a enfatisa cu e iniciativa lo crea oportunidadnan pa profesional Arubiano y fortalece e posicion di Aruba como un centro regional di educacion, investigacion y innovacion.