Temblor fuerte y explosion na centro comercial ta costa varios bida na Hapon

KUMAMOTO, Hapon – Un temblor fuerte di magnitud 7,1 a sacudi e isla Kyushu na Hapon. Mas di un ora despues, un explosion, probablemente causa pa gas, a ocuri den un centro comercial na Kumamoto. Autoridadnan a confirma cu tin varios morto, aunke e cantidad exacto ainda no ta conoci.

Segun testigonan, empleadonan y bishitantenan a sinti un holor di gas prome cu e explosion. Ora e explosion a sosode, e edificio tabata den proceso di wordo laga bashi. Parti di e centro comercial a basha, lagando hende keda atrapá bou di e ruina.

E temblor, cu ta e mas fuerte cu a dal Hapon den varios aña, tambe a causa falta di coriente, candela na algun lugar y daño na diferente edificio y brug. Un aviso di tsunami pa Ariake Bay a wordo kita poco despues.

Autoridadnan tambe a confirma cu no a haya ningun daño na tres planta nuclear cu ta den cercania. Hapon ta un di e paisnan cu mas biaha ta experimenta temblor, pero gracias na nan metodo di construccion resistente, hopi edificio ta logra keda para, aunke daño grave no por wordo evita tur biaha.