Ex edificio di Casino lo bira oficina pa Departamento di Recurso Humano

ORANJESTAD – E ex edificio di Departamento di Asuntonan di Casino (DAC) pronto lo haya un funcion nobo. Despues di un amplio proyecto di renobacion, e edificio lo wordo ocupa door di Departamento di Recurso Humano (DRH), cu lo usa e local pa ehecuta diferente tarea den cuadro di Tijdelijke Werkorganisatie (TWO) na beneficio di servicio publico.

Minister di Husticia, Integracion y Transporte Publico, Arthur Dowers, recientemente a inspecciona e progreso di e trabaonan, cu awor ta den nan ultimo fase. Segun minister, e edificio tabata den un estado deplorabel y tabata mester trabao structural y di mantencion.

Durante e proyecto, a renoba e infrastructura, corrigi diferente defecto y prepara e edificio pa ofrece un ambiente di trabao moderno, sigur y funcional. Den e siguiente fase lo instala e mobiliarionan di oficina, pa despues DRH por muda aden.

Minister Dowers a expresa satisfaccion cu e resultado y a indica cu gobierno ta sigui inverti den mehora di edificionan publico pa fortalece e calidad di servicio y e condicionnan di trabao.