ReD: Economia circular no ta un iniciativa nobo di gobierno

ORANJESTAD – Partido politico Red Democratico (ReD) ta sostene cu e maneho di economia circular no ta un iniciativa nobo, sino un politica cu ya tabata formalmente desaroya y entrega na gobierno actual door di ex-minister di Desaroyo Sostenibel, Rudy Lampe.

Segun ReD, e maneho tabata inclui un vision pa reduci desperdicio, stimula reutilisacion y reciclahe, y usa recursonan di un forma mas sostenibel. E partido ta bisa cu e iniciativa tambe tabata conecta cu e decision di elimina e uso di saconan di plastic den supermercado.

ReD ta cuestiona si gobierno actual ta presenta un maneho existente como un iniciativa propio, enbez di reconoce cu e base ya tabata documenta y transferi door di e gobierno anterior.

E partido ta enfatisa cu economia circular mester wordo considera un compromiso nacional y un politica di largo plazo, no un proyecto di un solo gobierno. P'esey, ReD ta pidi mas transparencia tocante e maneho existente y ta exhorta gobierno pa sigui cu implementacion en vez di "reinventa e wiel".