UE: TikTok no ta proteha menor di edad suficiente

BRUSEL – Comision Europeo a conclui cu e aplicacion TikTok no ta cumpli completamente cu reglanan europeo pa proteha menornan di edad. Segun e investigacion, e configuracionnan di privacidad di e accountnan no ta ofrece suficiente proteccion, loke por haci contenido di muchanan bira visible pa personanan cu nan no conoce.

Comision Europeo ta bisa cu videonan publica door di hoben di 16 y 17 aña ainda por wordo recomenda na otro usuario di TikTok. Ademas, perfilnan y portretnan di cuenta ta facil di haya, inclusive pa personanan cu no tin un cuenta di TikTok. Esaki por aumenta e riesgo cu muchanan ta drenta den contacto cu personanan cu tin mal intencion, bira victima di intimidacion via internet of enfrenta consecuencianan cu por sigui nan den futuro.

Bruselas ta pidi TikTok pa adapta su configuracionnan pa contenido di menornan di edad solamente ta visible pa personanan cu e hoben a acepta. Tambe e plataforma no mester recomenda videonan publica door di menor di edad na otro usuario.

TikTok lo haya e oportunidad pa contesta prome riba e conclusionnan di Comision Europeo. Si e contesta no ta satisfice , e compania por haya un multa di te 6% di su entrada anual mundial, loke por representa miles di miyon euro.

Ademas di esey, TikTok tambe ta enfrenta un otro investigacion di Comision Europeo pa supuesto uso di funcionnan cu por haci usuario bira demasiado dependiente di e plataforma.