DVG: Hantavirus na Venezuela no ta forma peliger directo pa Aruba

ORANJESTAD – Directie Volksgezondheid (DVG) a tuma nota di e noticia internacional tocante e fayecimento di tres persona den estado Anzoátegui, Venezuela, despues cu autoridadnan oficial di salud di e pais a confirma cu nan tabata infecta cu Hantavirus. Segun e informacion cu DVG a colecta, actualmente e situacion na Venezuela no ta forma un peliger directo pa Aruba.

Hantavirus ta, den mayoria di casonan, un enfermedad cu ta transmiti di animal pa hende, principalmente door di contacto cu orina, feces of saliva di cierto tipo di raton silvestre y otro animalnan cu ta carga e virus. Segun informacion oficial, no tin evidencia cu e casonan actual na Venezuela ta transmiti di hende pa hende.

Na Aruba no tin animalnan conocio cu ta portador di Hantavirus. Pa e motibo ey, e posibilidad di transmision local ta wordo considera hopi abou.

DVG lo sigui monitor e situacion di cerca. Si e evaluacion di riesgo pa Aruba cambia, e departamento lo tuma e medidanan necesario pa proteha salud publico y informa comunidad na tempu.