Pieters(PPA): “ATA no por bira un banco pa Gobierno”

ORANJESTAD – Parlamentario Eduard Pieters (PPA) a critica e decision di Gobierno pa usa fondo di Aruba Tourism Authority (ATA) pa financia maneho di desperdicio. Segun e, aunke mantene Aruba limpi ta un meta positivo, esaki no por hustifica cu ta pone ley ni Parlamento un banda.

Pieters a adverti cu, si ATA por paga proyectonan cu no ta cay den su mision original, e organizacion ta corre e riesgo di bira un "banco di Gobierno" pa financia diferente gastonan publico. Segun  e, esaki por habri porta pa uza e fondo pa otro proyectonan cu ta responsabilidad di diferente ministerionan.

E parlamentario tambe a expresa preocupacion cu Parlamento ainda no a ricibi suficiente claridad tocante con e Afl. 16 miyon lo wordo gasta. Segun Pieters, Parlamento ta e instancia cu mester controla e uzo di placa publico.

Ademas, Pieters a cuestiona e decision di no sigui un proceso completo di destaho publico, manera e ley ta stipula. Segun e, varios companianan interesa nunca a haya e mesun oportunidad pa presenta un oferta.

PPA a indica cu lo sigui cuestiona decisionnan unda tin duda tocante transparencia, legalidad y bon gobernacion.