HOH lo paga airco temporalmente pa trabounan di reparacion

ORANJESTAD – Horacio Oduber Hospital (HOH), hunto cu SOGA, a informa cu durante anochi di 20 pa 21 di juli lo haci trabounan esencial di reparacion na e sistema di aircondition di hospital. Pa permiti e trabounan realiza di forma seguro, e sistema lo wordo paga temporalmente for di 11:45 di anochi te aproximadamente 5:00 di mainta.

HOH ta reconoce cu e interrupcion temporal por causa algun incomodidad pa pashentnan, famianan, bishitantenan y personal, pero ta indica cu a tuma diferente medida pa limita e impacto. Segun hospital, e reparacion ta necesario pa garantisa un sistema di aircondition mas confiabel y un ambiente seguro y comodo den futuro.