Gobierno ta presenta maneho nobo pa amplia oportunidad di vivienda

ORANJESTAD – Gobierno di Aruba a presenta un maneho nobo pa otorgamento di tereno y construccion di vivienda, cu meta di crea un sistema mas husto, transparente y eficiente. Segun Minister René Herdé, e reforma ta responde na e escasez di vivienda y ta busca duna mas famianan Arubano e oportunidad di logra un propio cas.

E maneho nobo ta permiti mas proyectonan residencial y apartamento, ta amplia e plazo pa haya financiamento for di 30 pa 60 dia y ta introduci reglanan pa promove un uso mas eficiente di tereno. Tambe ta inclui medidanan pa combati speculacion y limita e transferencia di tereno di gobierno pa garantisa cu e ta beneficia principalmente residente y famianan di Aruba.