DEA: 15 di juli ta ultimo dia pa entrega documentonan di Arubalening

ORANJESTAD – Departamento di Enseñansa Aruba (DEA) ta recorda tur studiante cu a aplica pa un Arubalening cu diamars 15 di juli 2026 ta e ultimo dia pa entrega tur documentonan obligatorio pa completa nan peticion di prestamo di estudio.

E anuncio ta sigui e exitoso clausura di "Ban pa Bay 2026", un programa organiza den colaboracion cu Realign Coaching Consultancy & Services, cu apoyo di Stimuleringsfonds y Strategic Educational Alliance (SEA). Durante seis tayer, studiantenan a haya preparacion riba topiconan manera planificacion di estudio, liderazgo, independencia, maneho di presupuesto, integracion cultural y preparacion pa bida universitario, tanto na Aruba como den exterior.

Segun DEA, e aña aki a ricibi 423 peticion, di cual 63 ta pa estudio superior na Aruba y 360 pa estudio den exterior. Studiantenan cu no a participa den e tayernan obligatorio mester completa un tarea cu nan lo ricibi via e-mail prome cu nan por bin na remarke pa e Arubalening.

Tur peticion cu a wordo aproba digitalmente mester upload seis documentonan den e Portal di Arubalening, incluyendo diploma certifica, cuenta bancario local, prueba di seguro, carta di aceptacion di e institucion educativo, datonan di mayornan y e overeenkomst di Arubalening. Despues di aprobacion, studiantenan mester entrega dos copia original firma cu pen blauw di e overeenkomst y e verklaring na seccion Studiefaciliteiten di DEA. Sin e firma correcto, e prestamo no por wordo desembolsa.

Pa studiantenan cu ta bai Hulanda, 15 di juli tambe ta e fecha limite pa confirma of cambia nan seleccion pa e Arubalening NL Reisproduct, cu ta inclui e vuelo organiza pa 5 di augustus 2026. Despues di e fecha ey no lo por haci ningun cambio na e lista di pasaheronan.

DEA ta anima tur studiantenan pa controla regularmente nan portal, sigui e informacion oficial via www.ea.aw y social media di Education Aruba, y desea nan hopi exito cu e preparacionnan final pa nan siguiente paso den nan carrera academico.