DAS: Entrega di declaracion di scol ta obligatorio

ORANJESTAD - Departamento di Asunto Social (DAS) ta informa tur clientenan di Seccion di Sosten Financiero cu e entrega di declaracion di scol (schoolverklaring) pa aña escolar 2026–2027 ta obligatorio. Seccion di Sosten Financiero ta brinda sosten di bijstand temporal na famianan y cuidadanonan cu pa un of otro motibo a perde completamente of un parti di nan entrada economico. E sosten aki ta basa ariba ley y ta mara na diferente rekesitonan.

PERSONA CU TA BIN NA REMARCA PA ENTREGA E DECLARACION DI SCOL TA:

Clientenan mayor di edad cu ta sigui un estudio na scol den dia (volledig dagonderwijs).

Mayornan cu tin un of mas yiu cu ta atende scol den dia.

Mayornan cu tin un mucha di 3 aña cu ta atende un creche registra bou di Fundacion Pa Nos Muchanan (FPNM).

Tene cuenta cu cada mucha of hoben ta un declaracion di scol apart.

FECHA DI ENTREGA DECLARACION DI SCOL

E declaracion di scol diseña door di DAS lo wordo manda via e-mail pa tur scol. E aña aki tur mayor cu ta ricibi un bijstand y cu tin un yiu di 3 aña cu ta bai un creche cu ta registra bou di e Fundacion Pa Nos Muchanan (FPNM) lo mester busca e declaracion na e creche registra y entrega e declaracion na DAS. Esaki ta pa e mayor por sigui ricibi solamente e toelage di Awg. 300,- pa luna.

E declaracion di scol mester wordo entrega na un di nos localidadnan basa ariba e cliente su districto.  E fecha pa entrega e declaracion di scol ta: 24, 25, 26 y 27 di augustus 2026.  Nos ta pidi cooperacion di ora di entrega e declaracion (nan) di scol pa entrega esaki nan tur hunto si tin mas cu un yiu ta bay scol. Esaki ta importante pa evita cu algun declaracion keda falta. Ademas, lesa e instrucionnan cu ta riba e formulario bon y yena tur informacion corectamente cu ta ser pidi den e seccion cu mayor mester completa. Una bes cu nos ricibi e declaracion di scol, un trahador lo haci e control administrativo y si tin algun informacion adicional cu mester, DAS lo tuma contacto cu e cliente via Whatsapp of e-mail.

DAS lo manda e formulario na tur scol y creche registra bou di e Fundacion Pa Nos Muchanan (FPNM) den luna di Augustus 2026. Nos ta encurasha tur cliente pa tuma contacto cu e scol of creche di e alumno asina cu scol habri pa ta na tempo pa solicita e declaracion di scol.

Si e declaracion di scol no wordo entrega ariba e 4 fecha menciona, e bijstand di e cliente lo por wordo desactiva. Ademas, si e declaracion di scol wordo entrega despues di 27 di augustus 2026, e cliente no lo ricibi e schooltoelage den e siguiente luna, ni ouderlijke bijdrage y tampoco e sosten pa articulo di scol y ni e diferencia di luna di augustus 2026. Solamente lo ricibi e bijstand regular di september.

DESPUES DI ENTREGA

Ora DAS ricibi y procesa e declaracion di scol, e cliente lo por ricibi:

E schooltoelage pa luna: AWG 300,- pa luna.

E ouderlijke bijdrage: E sosten aki lo wordo transferi directamente na cuenta di e scol, te na un maximo di AWG 250,- pa mucha y hoben adulto.

E suma pa articulo di scol den luna di september: AWG 250,- pa mucha y hoben adulto y t’e cu un maximo di AWG 1.000,- pa famia. Muchanan di 3 aña cu ta ricibi bijstand pasobra nan ta bay creche, no ta ricibi suma pa articulo di scol den luna di september.

·        Backpay:  DAS lo duna bek e verschil di luna di augustus 2026 den luna di september 2026.

UNDA MI POR ENTREGA E DECLARACION DI SCOL (SCHOOLVERKLARING)?

Clientenan por entrega nan schoolverklaring na e localidad di DAS cu ta corresponde cu su districto. Nos ta situa na Caya Mario E. Harms 11 O’stad, Savaneta 6 of MFA Noord na e di dos piso. Nos ta encurasha nos clientenan pa entrega e declaracion di scol (schoolverklaring) na tempo y informa nos na tempo si un yiu of hoben adulto lo stop di bay scol ariba nos Whatsapp 593-3118 of ariba nos e-mail: bijstand@das.aw of por pasa libremente na un di nos localidad. Pa mas informacion, por fabor tuma contacto cu Departamento di Asunto Social.