Merca ta intensifica atakenan riba Iran; tension ta sigui subi

WASHINGTON / TEHERAN – Forzanan Arma di Merca a lansa un serie nobo di atakenan aereo riba diferente blanco den Iran, mientras cu presidente Donald Trump a bolbe adverti cu lo tuma accionnan aun mas duro si e conflicto continua escala.

Segun Forzanan Arma di Merca, e operacionnan tin como meta proteha e libertad di nabegacion den Estrecho di Hormuz, despues di reciente atakenan contra barco comercial y tripulacionnan civil cu Washington ta atribui na Iran.

Medionan di comunicacion estatal na Iran a informa cu explosionnan a wordo tendi den e ciudadnan costero di Konarak, Chabahar, Bandar Abbas y den provincia di Bushehr. Den algun area tambe a wordo reporta interrupcion di coriente electrico.

Iran a anuncia cu lo responde cu accionnan di retaliacion dirigi contra basenan militar americano den e region.

Durante e cumbre di OTAN, Trump a reafirma cu e no ta satisfecho cu e desaroyonan y a adverti cu Iran lo enfrenta consecuencianan severo si e tensionnan no baha. Mas trempan e presidente a declara cu e paro de fuego cu Iran ta practicamente termina.

Entretanto, ministro di Asuntonan Exterior di Iran, Abbas Araqchi, a confirma cu el a sostene un combersacion telefonico cu su colega di Qatar. Segun Araqchi, ambos ministro a enfatisa e importancia di diplomacia pa evita un escalacion adicional di e conflicto den Medio Oriente.