Na Hulanda no por tira vuurwerk particular durante cambio di aña proximo

DEN HAAG – Entrante 1 di augustus, un prohibicion nacional riba vuurwerk pa consumidornan lo drenta oficialmente na vigor na Hulanda. Esaki ta nifica cu durante e siguiente cambio di aña, e ciudadano comun no lo por tira vuurwerk mas.

E ley nobo a wordo aproba door di Tweede Kamer na 2025 despues di añanan di debate. E propuesta tabata un iniciativa di e partidonan Pro y Partij voor de Dieren. Awor cu e decision final a wordo publica den Staatsblad, e prohibicion ta bira ley oficialmente.

Aunke particularnan no por tira vuurwerk mas, clubnan y asociacionnan local ainda por organiza show di vuurwerk, tanten cu nan haya permiso di e municipio. Solamente organizacionnan cu tin un relacion sigur cu e comunidad, manera asociacion di bario, club deportivo of asociacion special di vuurwerk, lo por solicita un vergunning.

Segun e regla nobo, e organizacionnan por usa te na 200 kilo di vuurwerk decorativo (categoria F2) riba un tereno cu ta facilmente accesibel pa servicio di emergencia. E vuurwerk por wordo tira solamente dia 31 di december y espectadornan mester mantene un distancia minimo di 15, 40 of 60 meter, dependiendo di e tipo di fuegos artificial.

Pa consumidornan particular, solamente vuurwerk hopi leve, manera sterretjes y knalerwten (categoria F1), lo keda permiti. Vuurwerk cu ta haci explosion fuerte, manera rotjes y vuurpijlen, tabata caba prohibi desde 2020.

Gobierno Hulandes tambe lo lansa un campaña nacional di informacion durante e zomer pa informa ciudadano riba e ley nobo. Ademas, lo organisa dianan special unda hende cu ainda tin vuurwerk na cas por entrega nan sin problema.

E decision pa prohibi vuurwerk, a haya mas apoyo politico despues di cambio di aña 2024-2025, ora mas di 8.000 incidente a wordo registra, incluyendo un aumento di violencia contra polis y otro trahadornan di servicio di emergencia.

Algun partidonan tabata kier aplasa e entrada na vigor di e ley pa un aña mas, pa duna comerciante mas tempo pa adapta nan negoshi, pero e propuesta ey no a haya mayoria. Na mei di e aña aki, gabinete hulandes a reserva 100 miyon euro como compensacion pa comerciante cu tabata bende vuurwerk.