Code cora pa calor extremo ta wordo extende den parti di Hulanda

HULANDA – Autoridadnan meteorologico di Hulanda (KNMI) a extende code cora pa un dia mas den e provincianan di Limburg, Noord-Brabant, Gelderland y Overijssel debido na e ola di calor extremo cu ta afecta e pais for di awe diabierna.

Pa resto di Hulanda, cu excepcion di e Islanan Wadden, code oranje ta keda na vigor te mayan anochi. Ademas di e calor intenso, ta spera tormentanan fuerte awe anochi den sur di Hulanda y mainta anochi por tin mal tempo severo den henter e pais.

Temperaturan a pasa 35 grado Celsius den varios lugar y na algun sitio na Limburg incluso a alcanza 37,2 grado. Hospitalnan ta reporta un aumento di pacientenan cu deshidratacion, golpe di calor, problema di curason y complicacionnan relaciona cu enfermedanan cronico.

E calor extremo tambe a causa interrupcion den diferente actividadnan. Trabounan di construccion a wordo suspendi na hopi sitio, algun zwembadnan a sera, e desfile nacional di Dia di Veteranonan a wordo cancela y algun rutanan di bus na Limburg no ta circula.

E impacto di e calor no ta limita na Hulanda. Den otro paisnan europeo tambe a tuma medidanan, incluyendo cancelacion di e Pride anual na Paris y prohibicion di haci candela den e canton suiso di Basel.

KNMI a conseha tur ciudadano pa evita solo, bebe suficiente awa y tuma precaucion contra deshidratacion y sobrecalentamento, especialmente pa mucha, hende mayornan y personanan cu condicionnan medico.