Hulanda ta mira Venezuela como mayor menaza pa Aruba y e otro islanan di Reino

DEN HAAG – Hulanda ta considera e situacion na Venezuela y e crecemiento di crimen internacional organiza como dos di e mayor  menazanan pa seguridad di Aruba, Corsou y Sint Maarten. Esaki ta sali claramente for di e Strategia Internacional di Seguridad 2026-2030 nobo publica door di Ministerio di Asuntunan Exterior. Segun e documento, e instabilidad politico, economico y social na Venezuela por tin consecuencia directo pa e paisnan caribeño di Reino Hulandes. Ademas, gobierno hulandes ta adverti tocante e creciente influencia di potencionan stranhero den Caribe mediante inversionnan strategico, telecomunicacion, hafnan y otro infraestructura critico.

CRIMEN ORGANIZA TA SIGUI UN MENAZA REAL

E strategia ta identifica tambe e crimen transnacional organiza como un riesgo importante pa region. Hulanda ta reconoce cu e islanan caribeño ta vulnerabel pa actividadnan ilegal cu ta cruza frontera, manera trafico internacional di droga y otro forma di crimen organiza. Segun e informe, menaza cibernetico, dependencia economico di paisnan stranhero y intento di influencia politico of economico for di pafor tambe por afecta estabilidad y seguridad den Caribe.

CADA ISLA TIN SU PROPIO RETONAN

Gobierno hulandes ta enfatisa cu Aruba, Corsou y Sint Maarten no por wordo mira como un solo caso. Cada isla tin circunstancianan, necesidadnan y reto diferente. P’esey, medida di seguridad y politica futuro mester wordo adapta na e realidad specifico di cada pais.

SEGURIDAD DI ARUBA TA UN ASUNTO DI REINO

Aunke e strategia ta enfoca principalmente riba e situacion di seguridad na Europa, e guera na Ucrania y fortalecemento di OTAN y Union Europeo, e documento ta confirma cu seguridad di Aruba y e otro territorionan caribeño di Reino ta forma parti integral di agenda nacional di seguridad di Hulanda. Gobierno hulandes ta indica cu e desaroyonan geopolítico mundial y e situacion na Venezuela lo sigui wordo monitorea de cerca, pasobra nan por tin impacto directo riba  stabilidad, seguridad y prosperidad di e parti caribeño di Reino.