Van der Burg: “Mike Eman ta mustra liderazgo door di laga espacio pa otro generacion”

DEN HAAG -  Secretario di Estado pa Relacionnan den Reino, Eric van der Burg, diamars mainta a reacciona pa Noticiacla riba e anuncio cu Minister-President Mike Eman a haci anochi durante un reunion di partido, cu e lo entrega e cargo di prome minister riba 1 di januari 2027. Segun Van der Burg, e anuncio a bin como un sorpresa p’e, apesar cu ya tabata conoci cu Eman lo a bay  transferi liderato di su partido na September proximo.

PASO BALIENTE

“Tin masha poco lider cu na e punto mas halto di nan carrera politico ta tuma un paso asina baliente pa traha espacio pa un generacion nobo,” Van der Burg a expresa. E secretario di estado a destaca cu Aruba tin den Mike Eman un estadista di gran estatura, cu su nomber ta profundamente conecta cu historia politico di Aruba. E la describi e cooperacion cu Eman como agradable y constructivo, y a bisa cu e la conoce e como un gobernante comprometi y un homber cu ta mantene su palabra. Van der Burg a indica cu durante e lunanan cu ta bin ainda tin hopi trabou importante pa realiza hunto, incluyendo finalisa e proceso relaciona cu e Ley di Reino HOFA.

CONCLUI HOFA

“Mi ta spera pa sigui traha hunto cu premier Eman pa yega na un conclusion di e Ley di Reino HOFA. Nos tin ainda hopi pa haci y mi ta confia cu lo nos haci esey cu e mesun dedicacion y entusiasmo cu semper a caracteriza premier Eman,” Van der Burg a declara.