Corsou a keda reconoci como e pais mas chikito cu a clasifica pa Mundial di Futbol

HOUSTON - Corsou a agrega un logro historico na su historia deportivo despues cu Guinness World Records a certifica oficialmente cu e isla ta e pais mas chikito di mundo, segun cantidad di habitante, cu a logra clasifica pa un Mundial FIFA.

Segun e certificado oficial di Guinness World Records, Corsou, cu tabatin un poblacion di 156.115 habitante na momento di su clasificacion, a bira e pais mas chikito cu a asegura un puesto den Mundial FIFA 2026.

E certificado ta bisa:

"E pais mas chikito (segun poblacion) cu a clasifica pa Mundial FIFA di futbol ta Corsou, cu tabatin un poblacion di 156.115 persona ora cu nan a clasifica pa Mundial FIFA 2026 na Kingston, Jamaica, riba 19 di november 2025."

E reconocemento internacional aki ta confirma loke hopi fanatico y experto deportivo a considera como un hazaña extraordinario. Den un region unda paisnan cu poblacion hopi mas grandi ta compiti pa un puesto den Mundial, Corsou a logra supera tur expectativa y pone su nomber den historia di futbol mundial.

Pa hopi curasoleño, e clasificacion pa Mundial 2026 no solamente ta un exito deportivo, sino tambe un momento di orguyo nacional cu a uni e pueblo tras di su seleccion nacional.

Cu un poblacion relativamente chikito compara cu mayoria di paisnan cu ta participa den Mundial, Corsou a demonstra cu talento, determinacion y trabou duro por supera limitacionnan demografico.

E reconocemento di Guinness World Records ta agrega un capitulo nobo y unico na historia deportivo di Corsou, consolidando e clasificacion pa Mundial FIFA 2026 como un di e logro nan mas grandi cu e isla a conoce te cu awe.

Awor cu e record mundial ta oficial, Corsou no solamente ta den Mundial, pero tambe den e buki di recordnan mundial.