Islanan ABC ta aproba programa deportivo pa Weganan Interinsular 2027

WILLEMSTAD – Representantenan deportivo di Aruba, Boneiru y Corsou a aproba e programa pa Weganan Interinsular 2027 oficialmente y a discuti posibilidad pa amplia e evento den futuro cu mas isla y pais den Caribe.

Representantenan di IBISA (Aruba), INDEBON (Boneiru) y FDDK (Corsou) a reuni recientemente na Kralendijk pa evalua e edicion di 2026 y prepara pa e competencia di proximo aña.

Durante e reunionnan, a revisa e organizacion di e weganan, e programacion deportivo y puntonan cu por wordo mehora. Segun organizadornan, e evaluacion a confirma cu e evento ta sigui logra su meta principal: promove amistad, respeto mutuo, integracion y competencia saludable entre hobennan atleta di e islanan participante.

Ademas di deporte, e evento ta ofrece oportunidad pa desaroyo di hobennan y intercambio cultural entre participante di Aruba, Boneiru y Corsou.

Un di e temanan principal tabata e posibilidad pa amplia participacion den futuro. Entre e destinacionnan menciona pa wordo invita tin Saba, Sint Eustatius, Sint Maarten y Suriname.

E reunion a resulta tambe den aprobacion formal di e calendario deportivo pa 2027:

Aruba: 25 te 28 di februari 2027 – baloncesto 3x3, futbol y beach tennis.

Boneiru: 11 te 14 di maart 2027 – softball, beisbòl, dodgeball y waterpolo.

Corsou: 8 te 11 di april 2027 – atletismo, futbol y voleibol.

Representantenan di e tres isla a reafirma nan compromiso pa fortalece cooperacion regional y traha hunto cu otro pais of territorio cu ta interesa pa participa den edicionnan futuro.

E meta comparti ta organiza un evento di halto nivel deportivo y organizacional, mientras cu ta fortalece unidad regional y desaroyo di hobennan den Caribe.