IBiSA y VNO ta explora oportunidadnan di colaboracion pa beneficio di comunidad

ORANJESTAD – Instituto Biba Saludabel Aruba (IBiSA) a ricibi representante di Vertegenwoordiging van Nederland in Aruba (VNO) durante un reunion constructivo y positivo na su oficina.

E encuentro tabatin como obhetivo principal pa fortalece e relacion entre ambos organisacionnan y intercambia informacion tocante e diferente actividadnan, proyectonan y iniciativa cu nan ta desaroyando den beneficio di comunidad arubano.

Durante e reunion, IBiSA a presenta un resumen di su programa nan den area deportivo, educativo y social. E organisacion a pone enfasis riba promocion di actividad fisico, salud, inclusion social, bienestar y participacion activo di hubentud y comunidad.

Representante di VNO a expresa interes den e diferente iniciativa nan y a reconoci e aporte positivo cu e programanan di IBiSA ta haciendo den sociedad arubano.

Ambos organisacionnan a destaca e importancia di cooperacion entre institucionnan cu comparti e mesun meta di contribui na un comunidad mas fuerte, saludabel y inclusivo. Durante e dialogo, tambe a wordo identifica varios area unda colaboracion den futuro por fortalece e impacto di programanan existente y crea oportunidadnan nobo pa comunidad.

IBiSA a expresa su agradecimento pa e bishita y e interes demostra door di VNO. Segun e organisacion, e reunion a habri porta pa relacionnan institucional mas estrecho y posible colaboracionnan cu por beneficia Aruba na largo plazo.

IBiSA a confirma cu ta spera di continua e dialogo cu VNO y cu otro partnernan strategico pa sigui impulsando proyectonan cu ta contribui na un futuro mihor pa comunidad arubano.