Hulanda ta intensifica combate contra criminalidad grave den Caribe Hulandes

DEN HAAG – Hulanda ta amplia su esfuerzo pa combate criminalidad grave den e paisnan y islanan di Caribe Hulandes. Segun ministro di Husticia y Seguridad, David van Weel, reduci e asina yama ‘high impact crimes’ no ta solamente importante pa e islanan mes, sino tambe pa Hulanda, pasobra e desaroyonan den Caribe tin influencia riba ciudadnan Hulandes.

Den un raportahe di progreso manda na Tweede Kamer, e ministro a indica cu e cooperacion ta tuma lugar hunto cu e paisnan y islanan den marco di e agenda existente di husticia y seguridad. E enfoke principal ta riba prevencion di criminalidad, proteccion di potencial victimanan y reduccion di reincidencia.

HOBENAN DEN CENTRO DI E STRATEGIA

Un parti importante di e plan ta e implementacion di programanan preventivo pa hobenan. Entre e iniciativanan menciona tin e programa “Alleen jij bepaalt wie je bent”, e Leerorkest y oficialnan di reintegracion cu ta guia ex-prizoneronan durante nan regreso den sociedad. Ademas, Hulanda ta brinda apoyo na iniciativanan local y ta ofrece entrenamiento na organisacionnan y empresanan pa fortalece nan profesionalismo.

Segun e raportahe, e programa “Alleen jij bepaalt wie je bent” ta wordo aplica awor na Aruba, Boneiro, Corsou y Sint Maarten. Investigacion cientifico cita den e documento ta mustra cu participantnan di e programa ta drenta den contacto cu polis te dos biaha menos frecuente y ta wordo condena te tres biaha menos frecuente cu hobenan cu no participa.

PROBLEMA CU TA AFECTA HENTER REINO

Van Weel a splica cu e decision pa fortalece cooperacion ta basa riba e realidad cu problematica relaciona cu sospechoso y delincuentenan for di Caribe Hulandes tambe ta manifesta den grandinan ciudadnan di Hulanda. Pa e motibo ey, e ministro ta considera inversion den combate contra criminalidad grave riba e islanan como un interes comparti di henter Reino Hulandes.