Media Aleman ta advirti: “Cuidao cu Corsou” despues di victoria contundente contra Aruba

WILLEMSTAD – Corsou a causa impresion den algun medio di comunicacion Aleman despues di su victoria contundente di 4-0 contra Aruba den su ultimo partido preparatorio prome cu su debut historico den Copa Mundial FIFA 2026.

Corsou lo enfrenta Alemania dia 14 di juni den Grupo E, pero segun e diario Aleman Bild, e seleccion caribeño no mester wordo subestima. 

“Alemania, tene cuidao cu Corsou!” tabata e titular di e articulo. Segun e medio, Corsou, dirigi pa entrenador Dick Advocaat, a mustra cu e tin capacidad pa sorprende despues di gana Aruba cu autoridad.

Bild a describi e triunfo como un “ensayo general soberano” y a señala cu, mescos cu Alemania, Corsou a hunga su ultimo partido amistoso prome cu e Mundial.

Sky Sports Alemania tambe a dedica atencion na e actuacion di Corsou, destacando especialmente e segundo mitad di e partido. Segun e medio, despues di un prome mitarsin gol, Corsou a haya su ritmo y a domina e encuentro pa termina cu un victoria convincente di 4-0.

No tur medio Aleman tabata mes entusiasma. Die Welt a destaca repetidamente cu Aruba ta ocupa solamente puesto 189 riba ranking FIFA. Mientras tanto, Kicker a opina cu Corsou a confronta dificultad durante gran parti di e partido contra su isla bisiña.

Corsou, cu ta considera e pais mas chikito cu a yega di clasifica pa un Mundial, lo haci historia dia diadomingo 14 di juni ora e enfrenta Alemania den su prome partido oficial di Copa Mundial. Despues di esey, e seleccion lo enfrenta Costa di Marfil y Ecuador den e   partidonan restante di Grupo E.

E resultado contra Aruba a aumenta expectativa rond di Corsou y a pone e seleccion riba radar di diferente medio internacional, cu ta advirti cu Alemania no mester subestima e representativo caribeño. NOTA: Fuente Telegraaf. NOTA: E potret di noticiacla di e seleccion ta di e prome seleccion di Corsou cu a cuminsa e wega contra Aruba diasabra ultimo.