Van der Burg contento cu Raad van State a entrega conseho riba HOFA lihe

ORANJESTAD – Secretario di Estado Hulandes pa Relacionnan di Reino, Eric van der Burg, a indica cu ainda e no por reacciona riba e contenido di e conseho cu Raad van State (Conseho di Estado di Reino) a emiti tocante e propuesta di Ley Reino HOFA. Esaki tabata su prome reaccion na noticiacla dialuna mainta. 

REACCION CONHUNTO 

Segun Van der Burg, manera a wordo comunica anteriormente, Aruba y Hulanda awor lo presenta un reaccion conhunto riba e conseho. E reaccion ey ta wordo prepara actualmente y ta spera cu lo wordo manda poco despues di receso di zomer na Tweede Kamer den Hulanda y tambe na Parlamento di Aruba, Corsou y Sint Maarten.

SATISFECHO

Aunke e no a bay den detaye riba e contenido di e conseho, Van der Burg a expresa su satisfaccion cu Raad van State a logra entrega su evaluacion den un tempo relativamente cortico. “Nos no por comenta ainda riba e contenido di e conseho, paso lo bin un reaccion conhunto di Aruba y Hulanda. Pero Secretario di Estado ta contento cu Conseho di Estado a entrega e conseho asina rapido y ta hopi gradici nan pa esey,” segun e declaracion.

PASO IMPORTANTE

E conseho di Raad van State ta wordo considera un paso importante den e proceso legislativo di HOFA, e ley cu tin como meta fortalece y garantisa finansas publico sostenibel pa Aruba. Aruba y Hulanda lo analiza e recomendacionnan prome cu presenta nan posicion oficial conhunto den e proximonan luna.