RvS: HOFA no ta viola autonomia di Aruba, pero mester adapta algun punto si

ORANJESTAD – Conseho di Estado di Reino Hulandes (Raad van State) a revisa e propuesta di Ley Reino HOFA (Houdbare Overheidsfinanciën Aruba) y a conclui cu e proyecto di ley ta basa riba e acuerdo administrativo cu Aruba y Hulanda a firma na juni 2024. E meta principal di e ley ta logra y mantene finansas publico saludable y sostenibel pa Aruba, mientras cu supervision financiero di Reino ta keda temporal.

REGLANAN GENERAL

Segun e propuesta, e actual supervision financiero temporal lo wordo cambia pa un sistema nobo basa riba un ley di Reino y un ley local di Aruba. E ley di Reino ta establece reglanan general y e ley local (Lwho) ta determina metanan concreto manera nivel maximo di debe, saldo presupuestario y reserva financiero.

PROGRESO IMPORTANTE

Conseho di Estado ta reconoce cu Aruba a haci progreso importante den su situacion financiero. Actualmente e debe nacional ta alrededor di 61% di Producto Interno Bruto (PIB), un nivel mas abou cu promé di pandemia di Covid-19. Ademas, Aruba a logra presenta surplus presupuestario durante añanan reciente.

PREOCUPACION

Sin embargo, Conseho di Estado a expresa preocupacion tocante algun aspecto di e ley. Un di e puntonan principal ta cu Gobierno y Parlamento di Aruba no por cambia ciertonan disposicion den e ley local sin aprobacion previo di Consejo di Ministernan di Reino. Conseho di Estado ta comprende e necesidad di proteha e metanan financiero acorda, pero ta recomenda cu e rekisito di aprobacion ta limita solamente na e metanan numerico relaciona cu debe y saldo presupuestario, pa proteha autonomia di Aruba tanto cu posible.

MAS CLARIFICACION

Tambe ta pidi mas clarificacion tocante proyectonan di cooperacion publico-priva, e alcance di refinanciamiento di prestamonan externo di Aruba y e proceso pa determina ora Aruba por pasa na supervision mas ligero of eventualmente elimina e ley.

HOFA NO TA VIOLA AUTONOMIA DI ARUBA

Importante ta cu Conseho di Estado no ta bisa cu HOFA ta viola autonomia di Aruba. Al contrario, e opinion ta confirma cu e ley ta basa riba Articulo 38 di Statuut, cu ta permiti cooperacion boluntario entre paisnan di Reino. Conseho di Estado ta enfatisa cu cualkier limitacion di autonomia mester keda estrictamente limita na loke ta necesario pa logra e metanan financiero acorda entre Aruba y Hulanda.

SOLICITA ELIMINACION DI E LEY

Si Aruba cumpli cu tur normanan durante minimo tres aña consecutivo, e pais por solicita eliminacion di e ley y pone fin na supervision di Reino. En conclusion, Conseho di Estado ta considera HOFA como un instrumento legal legitimo pa fortalece finansas publico di Aruba, pero ta recomenda varios aclaracion y adaptacion pa proteha e autonomia constitucional di Aruba miho y aumenta claridad den e aplicacion di e ley. Lesa e conseho completo AKI.